政情：國泰服務員係健美小姐
十月份「國泰天地」訪問咗一位國泰顧客服務員余迪希（Heidi），原來佢係一位健美小姐，去年勇奪香港健美錦標賽季軍，獲獎後代表香港密密出戰，幾乎忙過返工。為咗以最佳體態示人，Heidi每星期到健身中心多達五次，辛苦鍛煉難唔到佢，但反而戒食零食就最辛苦，令小妮子大呻係最難抗拒嘅誘惑。
自從去年獲獎之後，Heidi已代表香港前往新加坡、台灣及越南等亞洲城市參賽，月初又去咗曼谷參加亞洲健美錦標賽，獲得第五名。為咗備戰，佢要用好多時間鍛煉，令自己隨時保持最佳狀態，話佢忙過返工都唔為過。
Heidi話，平時佢每周前往健身中心二至三次，若預備出賽就會增至五次，最鍾意用跑步機進行有氧訓練，或到吐露港附近跑步。就算喺屋企睇電視，都會一邊鍛煉單臂彎曲、三頭肌屈接及弓步等，所以話完美體態得來不易。