政情：林D9當衰用司機都惹火
市民對問責官員嘅要求特別高，稍有不慎就會成為各界炮轟嘅對象，最新例子係以歷來最低民望接任政務司司長（CS）職務嘅林瑞麟（林D9）。據聞最近有五個政府司機工會一同去函立法會投訴，踢爆林D9連用司機嘅安排都搞到一團糟，因為佢將以前做局長時聘請嘅私人司機安排到特首辦工作，質疑佢嚴重違反政府嘅聘用條款。究竟事件係林D9嘅錯，定係別有內情，大家要自行判斷喇！
自從林D9接任CS，好多人都睇佢唔順眼，最近政府司機職系工會聯席委員會等五個政府司機工會去函立法會，炮轟林D9早前以局長身份外聘私人司機，理論上應該跟隨調動到司長辦公室工作，但林D9突然發覺需要用番前CS嘅貴賓車私人司機，加上前特首辦主任譚志源又帶埋舊有司機過政制及內地事務局，所以林D9將自己聘請嘅私人司機安排到特首辦工作。
恐破壞公務員制度
五個工會質疑，林D9此舉嚴重違反政府嘅聘用條款，加上林D9近年處事經常繞過現存有效公務員機制，選擇性利用權力達致個人嘅喜好，所以佢哋擔心林D9晉升司長後，繼續咁樣處事，唔單止破壞港府百年健全公務員制度，更甚會影響現時管治班子威信喎。政府發言人回應話，林D9出任局長時嘅司機，獲特首辦主任按照政治委任制度聘任，強調各項安排都符合相關制度喎。
林D9惹火事件豈只一單，佢會否搬入山頂白加道司長官邸係另一個焦點。據聞林D9今次學精咗，一方面認為任命只有九個月，又唔想搬出搬入咁麻煩，所以唔打算搬入官邸。至於九個月後會否搬入官邸，據聞林D9冇正面回應，反指應該問吓啲疑似特首候選人喎，講白啲即係問吓下屆特首用唔用佢囉！
話時話，其實講乜都係假，最重要係身體健康先至有得爭，曾經做過通波仔手術嘅林D9自己知自己事，晚晚都食得好清淡，兩公婆只係食豆腐同魚。
不過又有政界中人就話見到林D9食大盆牛肉同飲白酒喎，真係信不信由你喇！