中環出更：潮青蘇仲成搞有機私房菜
都市人逐漸注重健康飲食，搞食肆要突圍真係唔容易。香港潮州商會青年委員會委員、新確科技有限公司執行董事蘇仲成（Michael）就睇準時機，月前喺銅鑼灣禮頓道開咗間「有机飯堂」，主打與別不同嘅地中海有機fusion私房菜，佢對業務充滿信心。
卓妮見到「有机飯堂」個名就好好奇，點解個「机」字要用簡體字呢？Michael話，因為餐廳用嘅蔬菜八成來自北京有機農場「翠京元」，自己做埋品質監控，食得安全又放心。佢話，有机飯堂嘅特色除咗搞有機菜外，仲堅持走高格調路線，座位唔多，坐得零舍舒服。
藍莓豬脊肉 外脆內軟
有机飯堂大廚Butler望落好後生，曾經喺瑞士跟過法國名廚學師，又喺萬豪酒店工作四年，同Michael分屬老友，所以過檔幫手。Butler最拿手係藍莓威士忌汁配豬脊肉及清炒時令蔬菜，前者要好花心機，用上西班牙黑毛豬脊肉以慢火燉四個鐘，浸過夜後再切片煎香，令到豬肉外脆內軟、肥而不膩。後者用橄欖油加意大利銀魚柳清炒時蔬，再灑上巴馬臣芝士粉，將有機蔬菜嘅真味毫無保留地發揮出來。
有机飯堂嘅價錢都好相宜，一個set lunch頭盤主菜連飲品都係約一百元。飯堂仲設有六座位貴賓房，如果想訂私房菜，三日前預訂就得喇，每位不過五百元，真係幾抵。卓妮見到Michael凡事都親力親為，一邊關心食客對食物嘅意見，一邊落力介紹有機菜。咁有心，難怪舖頭只係開咗個多月，幾乎晚晚爆棚啦！
卓妮