特首選舉將進入埋身肉搏階段，唐英年（唐唐）同梁振英（ＣＹ）兩大陣營支持者已陸續蒲頭，但亦有人要睇定啲先。行政會議成員張炳良尋日以香港教育學院校長身份出席教院活動時，就被追問佢究竟係「唐營」定係「梁營」，點知佢就故弄玄虛，自認係「梁營」。正當大家以為有新聞之際，佢隨即澄清係良好個「良」喎。
張炳良解釋，有競爭嘅選舉係好事，無論乜嘢人士、乜嘢派別嘅人參選，都應該交代多啲政綱同理念，等大家可以考慮究竟有關候選人適唔適合做特首。講到教育政策，究竟唐唐同ＣＹ邊個熟悉教育多啲呢？張炳良就「耍太極」話，佢哋兩個都有教育背景，做過大學校董，不分上下。
教育局局長孫明揚年初被揭患腎衰竭，問張炳良有無人搵過佢接替孫公做下屆教育局局長，佢好肯定咁話無。再追問如有人搵佢頂上，佢會唔會做呢？張炳良好曖昧話無諗過呢個問題喎。
另外，盛傳支持ＣＹ嘅恒隆主席陳啟宗尋日出席一項活動時，指下屆特首須着手解決香港嘅深層次矛層，包括貧窮問題、房屋問題、金融服務業競爭力下降等，全部都係ＣＹ主持嘅競選議題，明顯語有所指。