政情：派紅Van闖禁區 黎銘洪博拉
香港紅色小巴業界經常大呻被歧視，事關紅Van營運牌照費全港最貴，禁區最多，大部分快速公路及多條主要隧道都禁止紅Van行走，暫停載客者亦被抄牌，搵食愈來愈艱難。的士小巴權益關注大聯盟主席黎銘洪，多年來為爭取開放新市鎮及道路禁區經營想盡辦法，尋日仲專登派出兩部紅Van違法闖入東涌禁區博抄牌，但有交通警尾隨都當睇唔到。
黎銘洪尋日朝早派出兩部紅Van，由深水埗出發經美孚，再進入紅Van禁區嘅長青隧道、青馬大橋、沿北大嶼山快速公路直入東涌，仲喺東涌新市鎮兜咗幾個圈博警方抄牌，打算獲取告票後透過司法覆核程序上訴，迫使當局開放小巴「禁區」。不過，兩部紅Van全程出奇地冇被交通警員截停抄牌，其中一段路更有交通警尾隨，但都當兩部紅Van透明，搞到黎銘洪尷爆，擬擇日再試。
我哋尋日問過運輸署，該署證實北大嶼山快速公路不准紅色小巴行駛。警方發言人話，如違反《道路交通（快速公路）規例》第４條，首次被定罪，可處罰款五千元及監禁三個月，再犯者可罰款一萬元及監禁六個月。