政情：立會攝影房鬼影幢幢
煲呔曾為咗喺立法會新大樓宣讀佢最後一份施政報告，要全世界趕工嚟滿足佢一己私欲。所謂欲速則不達，即將入伙嘅新大樓仲係甩甩漏漏，尋日立法會秘書長吳文華（Pauline）帶傳媒參觀新大樓時就發現其中一樣嘢「透明度」好低，就係記者攝影房嘅玻璃太黑，而會議廳嘅燈光又唔夠勁，搞到影出來嘅人統統變成鬼影，結果搞到要拆玻璃先至掂。
尋日驟眼所見，新大樓嘅裝修工程搞得七七八八，秘書處職員亦正密鑼緊鼓進行測試，估計十二日開會將不成問題。不過，開會無問題，唔代表傳媒採訪無問題，攝記們去到攝影房一睇，立即發現大件事，原來分隔攝影房同會議廳嘅玻璃顏色太深，加上為咗隔音，部分攝影房裝咗兩塊玻璃，令攝記影出嚟嘅相片鬼影幢幢，十足警方口中所謂嘅「黑影」。
Pauline知悉後大為緊張，立即同攝記們想辦法解決，諗咗一個下晝之後，Pauline從善如流，將兩塊玻璃減少到一塊，並會撕走玻璃表面嘅保護遮光膜，同時會加強會議廳及各會議室嘅燈光，等今明兩日搞掂後，後日再請攝記們去睇吓有否改善。呢啲技術性問題，估唔到Pauline一個下晝就解決咗，效率亦比政府高好多。
秘書處免責條款 值得斟酌
不過，一講到結構性問題，就無乜辦法解決，好似記者室距離會議廳足足有成百幾呎，而且沿路九曲十三彎，將來記者要追訪議員或官員，首要條件就係跑得快，否則行遲半步都畀佢哋走甩。仲有秘書處向記者提出唔少免責條款，當中有啲都幾值得斟酌，好似因為新大樓壞
、壞扶手電梯、停電或者公用設施失靈而導致傳媒損失，秘書處一概唔會負責喎，真係卸得就卸。
講到尾，立法會係接受公眾同傳媒監察嘅地方，過去一直好樂意聽市民同傳媒嘅意見，唔似得夕陽政府閉門造車。自從新政府總部舉行過開幕儀式呢啲攞彩嘢之後，政府一次都冇請過傳媒去參觀，所以話呢，由選舉產生嘅立法會，處事始終好少少嘅。