中環出更：劉文文為「吸煙」頭痛
專責推廣反吸煙運動嘅吸煙與健康委員會主席劉文文（Lisa），自從年初促成政府勁加煙稅逾四成後，暫時按兵不動，反而最近同「架己冷」潮州商會青年委員會副主任胡炎松（Anven）合力搞慈善長跑，貫徹佢推廣健康生活嘅本色。
日前Lisa、Anven及啟德扶輪社創社社長李婉華茶敍，密斟十月卅日喺大美督舉行嘅《扶輪十公里挑戰慈善賽》。活動由香港長跑會主辦，啟德扶輪社有份贊助，籌款受惠機構係「關愛孩子」計劃。Anven係賽事籌委會主席，梗要瞓身睇實啦。
Lisa擔任嘅公職唔少，要數曝光率最高嘅梗係吸煙與健康委員會莫屬。不過講起個機構名字佢就好頭痛，事關「吸煙」兩字令人混淆，應該改為「控煙」，但改名涉及修例、刊憲等龐大工程，所以唔敢貿然進行，惟有暫時忍住先喇！