中環出更：戴尚安攝影展 媽咪感自豪
前民政事務局常秘李麗娟胞妹李桂蘭係城中潮人，桂蘭嘅次子戴尚安（Sean），遺傳咗媽咪愛美嘅觸覺，無師自通，成為攝影名家，空中、海底攝影樣樣皆精。Sean最近為影星貝安琪操刀留倩影，日前仲大搞攝影展，卓能集團主席趙世曾都捧場買番一幅返屋企珍藏。
三十二歲嘅Sean，早前應貝安琪邀請，為其拍攝瑜伽課程影碟及相片，靚仔影靚女，新作唔靚就奇。上周四佢喺畫廊開影展，除咗媽媽李桂蘭同姨媽李麗娟撐場外，富豪趙世曾父子、藝人王敏德等齊到賀。靚相即場有售，李麗娟第一時間買番一幅，而趙世曾都搶埋一份。
影紅衫魚攞獎
阿Sean咁叻仔，李桂蘭都為囝囝感到自豪，佢話囝囝自細熱愛藝術，十三歲留學英國時迷上攝影，記得有次返香港度假，去街市影咗一批紅衫魚橫陣嘅相片，拿回學校參賽，結果大獲好評兼攞獎。鋒芒初露，阿Sean放膽去影，非洲大草原、北極雪地，都有其蹤影，就連媽咪嘅證件相，都係由佢操刀。
不過，阿Sean最愛還是影人像，曾經幫時尚潮人郭志怡、藝人謝婷婷等影靚相。妹妹戴尚蓮亦都唔執輸，喺美國執導拍攝紀錄片「PLANEAT」，講述人類如何透過改變飲食習慣去拯救地球，十二月底就會喺香港首映。
卓妮