近大半數立法會議員已經將辦公室搬入新大樓，但至於復會時會否正式移師新大樓，現時仲未講掂數。行政管理委員會尋日開會，泛民議員表明唔想咁快搬入去住，據聞有人諗住玩大佢，話煲呔曾喺十月十二日喺新大樓宣讀施政報告時，泛民議員可能玩杯葛缺席，蹺起煲呔曾，等佢全程望住啲空櫈。
我哋問過幾位行管會嘅泛民議員，其中何秀蘭話，雖然入面已經裝修到八八九九，但立法會要向公眾負責，唔係會議廳整得企企理理就得，要連會外嘅配套措施都要齊備，等公眾可以好方便、好舒適咁去到新大樓。何秀蘭仲話，現時新大樓外只得一條由西灣河嘉亨灣開出嘅巴士線，如果住喺其他區，就無可能搭巴士到新大樓。
至於接駁地面嘅行人天橋，現時亦無路牌，指示好唔清晰，何秀蘭認為搞掂晒呢啲嘢先至正式啟用都未遲。由於行管會仲未有共識，所以明日會再開多次會才決定復會使用新大樓會議廳。