政情：馬清鏗教80後「上車」
八十後成日呻買唔到樓，但其實依家有樓揸手嘅年長一輩，當年都好難買樓。好似前東華三院主席馬清鏗，佢話自己廿幾歲嗰陣時，都係一樣未買到樓，所以奉勸年輕人要衡量本身嘅供款能力，唔好期望一買就買半山，可以考慮吓喺元朗、天水圍較偏遠地區上車先喎。
馬清鏗仲話，其實政府推出嘅樓市措施都好足夠，反而依家最重要嘅工作係幫助中下階層市民解決居住問題，令普羅市民都有屋住。近日股市好反覆，馬清鏗話歐債危機對全球影響好大，但遲早會搞得掂，最多印多啲銀紙啫，佢建議大家有股票在手嘅，最好放咁啲，改買長債。
不過，前領匯主席鄭明訓就唔係咁睇，覺得歐債危機有排搞，建議大家唔好將焦點淨係放喺希臘上，唔好着眼於一個地方。至於樓市方面，佢認為政府應該推多啲優惠政策幫新一代買樓，好似復建居屋，至少令到年輕人對個社會有番希望喎。