政情：公文袋亂港引火自焚
港珠澳大橋環評報告司法覆核一案審完後，公民黨飽受各方狠批，提出訴訟嘅朱綺華婆婆爆大鑊，話自己唔會上訴，因為自己乜嘢都唔識，係有人叫佢先咁做，唔少人認為公文袋喺背後推波助瀾。同大狀黨一樣打中產旗號嘅自由黨就再度發炮，副主席周梁淑怡要求公文袋交代究竟有無教唆過朱婆婆打官司，睇嚟公文袋今鋪水洗都唔清，加上外傭居港權案今日宣判，各界勢必火燒公文袋，睇嚟該黨嚟緊區選選情真係危危乎。
幫朱婆婆打官司係公文袋執委黃鶴鳴，提出司法覆核嘅朱婆婆又係公文袋義工，如今朱婆婆仲要話自己唔識法律程序，係有人教佢至識，所以公文袋好自然同呢單官司扯上關係。由於公文袋勢危，自由黨就打蛇隨棍上，今日喺報章刊登廣告，話要「緝拿幕後黑手」。周梁尋日亦發炮，話依家種種迹象顯示，打官司咁大件事，朱婆婆背後有人教路，唔似係出自佢老人家意願咁簡單。
周梁又話，因為呢單官司，港珠澳大橋工程成本上升六十五億元，要由納稅人埋單，大狀黨作為政治團體，唔可以一句「畀專業意見」，就將責任推得一乾二淨。不過，一波未平，一波又起，涉及全港三十萬外傭居港權案今日判決，今次幫外傭打官司嘅李志喜，又係公文袋黨員，雖然佢唔係執委，但當年都有份創黨。如果單官司判外傭勝訴，會否好似港珠澳大橋案咁，令公文袋背負「幕後黑手」罪名呢？
落區拉票 唔敢響朵
據聞公文袋黨高層認為今次問題唔係太大，但區會選舉就嚟開始，該黨班競逐連任嘅區議員就好緊張，每逢落區向街坊拉票時，都只提政績，反而絕少將「公民黨」三隻字掛喺嘴邊，似乎想同個黨劃清界線。今屆區選佢哋派咗四十二人出戰，究竟能否好似上屆咁贏到十二個議席，已經好難講，如果要贏夠十五席，為明年立法會超級區議會議席取得足夠提名，睇怕都係癡心妄想囉！