中環出更：鍾志平想買「極地」博升值
由仁愛堂與野外動向合辦嘅中學生北極考察團，已經結束為期十七日嘅旅程，全團三十八人平安返港，尋日喺港大分享旅程嘅所見所聞。仁愛堂總理蘇煜均就帶備月餅去北極歡度中秋，而活動贊助人工業總會主席鍾志平（Roy），最難忘絢麗多彩嘅北極光同壯觀嘅冰川，但可惜北極動物就唔多見，全程只見過一次沒精打采嘅北極熊。
阿Roy過去已兩次到訪南極，但到北極都只係第一次，除咗欣賞壯觀嘅冰川外，對北極嘅地理亦感興趣，佢話喺冰島有一處地方，係歐亞板塊與北美洲板塊交接之處，亦係由北極圈延綿至南極洋一萬六千公里中唯一露出水面嘅部分。佢笑稱，喺嗰度買地就正囉，因為基於地殼運動，土地會不斷延伸，夠耐性嘅話一定會多幾呎地喎。
全球暖化 破壞景觀
同樣曾到訪南極嘅王同學話，九月份嘅格陵蘭係陽光海灘與冰川並存，故此今次拍攝嘅相片，驟眼看來似石澳泳灘或東平洲，由此可見全球暖化嘅威力。香港大學地球科學系教授陳龍生就話，全球暖化已令北極圈顯露咗好多土地同植物，所以大家唔好為咗短暫嘅經濟利益，而令地球構成長遠嘅嚴重破壞。
卓妮