中環出更：郭晶晶自爆計劃做主婦
跳水公主郭晶晶自年初宣布退役後，出席公開活動少咗好多，但尋日佢就一次過同逾千位學生聚會，分享自己嘅奮鬥故事，佢男友霍啟剛仲變身做「粉絲」，拉隊去撐場。在場同學好關注晶晶嘅退役生活，仲單刀直入問晶晶會否嫁人專職做家庭主婦，晶晶就甜絲絲話：「會一步一步慢慢計劃」。
晶晶尋日應邀出席喺九龍灣展貿舉行嘅中華傑出青年領袖講座，當進入會場時，逾千位同學高呼：「郭晶晶我愛你！」而晶晶亦禮尚往來同大家打招呼。晶晶獲獎無數，好多人都想知佢點樣堅持進步，佢話心態最重要，無論成功或失敗，都要用同一心態面對，仲勉勵同學要努力「珍惜每一個瞬間」，否則成功都只係「一剎那成功」喎。
分享奮鬥史 霍啟剛撐場
晶晶喺台上講咁耐，以香港學生活動基金會董事身份出席活動嘅霍啟剛就喺台下專心聆聽，影活動大合照時仲用手機幫女友影相。近排晶晶退役嫁人嘅傳聞不絕，好多人都想知佢哋幾時會拉埋天窗，但一直只聞樓梯響。不過，當被問到退役後會否做家庭主婦時，晶晶就笑笑口話：「會一步一步慢慢計劃！」唔知啟剛會否好似大家一樣咁心急呢？
卓妮