政情：毓民大舊鬧爆長毛
一眾立法會議員嘅中區辦事處近日陸續搬入添馬艦新立法會大樓，其中「掟嘢三人組」人民力量黃毓民、陳偉業（大舊）同社民連梁國雄（長毛），被其他議員集體杯葛，被迫搬到新大樓十樓嘅角落相依為命，與立法會秘書處職員為鄰。不過三人並未因而槍口一致對外，尋日毓民同大舊為新議辦舉行入伙儀式，更隔空大鬧舊戰友長毛嘅區議會選舉狙擊行動。
轟揀錯狙擊對手
毓民同大舊上星期已遷入新議辦執嘢，尋日舉行切燒豬入伙儀式。新議辦對正駐港解放軍總部，大舊講笑話可以乘機竊聽解放軍有咩傾。不過一講到長毛準備喺區選狙擊新民黨副主席田北辰，大舊立即收起笑容，勁鬧長毛咁做只會搶到同區民主黨候選人嘅票，根本傷唔到田二少。毓民亦話唔明點解長毛有言在先，都唔狙擊公民黨嘅湯家驊。
長毛為自己辯護，強調佢狙擊嘅係反對「五區公投」同贊成政改方案嘅人，雖然湯家驊個人反對「公投」，但最後喺立法會投票都係反對政改方案，反而田二少就符合晒兩個條件，兼且係一個有錢人，啱晒佢口味。其實人民力量狙擊民主黨，亦畀民主黨指摘為「民建聯Ｂ隊」，只會幫咗建制派，依家只不過係角色調換啫。
不過，長毛晚上又透過facebook宣布放棄狙擊田二少，改為去中西區觀龍樓選區狙擊民建聯嘅葉國謙，今日就會落區爭取居民提名，真係峰迴路轉，唔知佢係咪念舊情唔想同毓民與大舊反面呢？