中環出更：羅仲榮片場娶新抱
近期商界喜事接踵而來，尋晚輪到前行政會議成員、金山工業集團主席羅仲榮娶新抱，其公子羅揚傑（Alan）迎娶JIA精品酒店創辦人黃佩茵（Yenn）。Alan並無繼承父業，反而走去搞The Press Room餐飲集團，所以今次一對新人可以講係酒店業同餐飲業嘅結晶，確係襯到絕。唔單止咁，佢哋擺酒嘅地點亦別出心裁，選擇喺清水灣道邵氏片場，兩人仲着埋長衫馬褂，真係創意十足。
八百嘉賓 冠蓋雲集
卓妮去到婚宴會場外，發現燈光好暗，要強勁閃光燈先至捕捉到賓客到臨。尋晚婚宴冠蓋雲集，除咗部分官員出席外，仲見到行政會議召集人梁振英、前財爺梁錦松及太太伏明霞、自由黨榮譽主席田北俊、大家樂集團太子女陳浩寧及未婚夫趙益坤、立法會議員霍震霆及大仔霍啟剛等。卓妮問霍震霆幾時做老爺，仲問啟剛幾時結婚，點知兩父子都笑而不答，揮揮手就走咗去。
本身係香港設計大使董事會主席嘅Alan話，由於今次請咗成八百名嘉賓，需要好大地方，但係香港擺大型婚宴嘅地方實在選擇唔多，所以最後揀咗邵氏片場，貪佢地方夠大，而且四面黑牆可以自由發揮布置意念。佢話婚宴布置以Country Home為主題，加啲懷舊Feel，係同老婆一齊諗出嚟嘅。Alan仲透露同Yenn拍拖三年，但就唔肯講求婚過程，話唔浪漫喎。講到三年抱兩，Alan話順其自然喎，睇嚟羅爸爸想抱孫都要順其自然喇！
卓妮