政情：劉鳴煒CY同場唔同路
被視為疑似特首候選人唐英年陣營嘅華人置業集團副主席劉鳴煒，尋日代父捐出一億二千五百萬元畀城市大學，成為城大歷來最大筆個人捐款。咁啱有份代表大學收款嘅，正正係另一疑似特首候選人兼城大校董會主席梁振英（CY）。不過劉表明今次捐款係資助城大，非捐畀某個人，搞到身旁嘅CY勁尷尬，要以笑遮醜。
捐款城大碰頭無芥蒂
尋日劉鳴煒同CY碰頭，兩個都表現得好大方，握手之餘仲不時密斟，表面上似乎好投契。不過，會後兩人面對傳媒交代捐款一事時，劉鳴煒就被問及會否撐CY選特首，佢即時劃清界線話：「捐錢資助嘅係城大，唔係某個人，我哋睇好嘅係城大多年做出嘅成果……無論CY定係邊個做校董會主席，無論邊個做校長，我都會支持城大！」
企喺劉鳴煒隔籬嘅CY，惟有咧嘴而笑兼講咗句「非常多謝」打圓場。之後劉鳴煒就喺CY半推半就之下離開，返入酒會同其他賓客交談，而CY就繼續回應記者提問。雖然劉鳴煒尋日以「不接受訪問」來迴避自己是否唐營一分子，但睇佢回應會否撐CY選特首，就知佢哋應該唔係同路人喇。