政情：張永霖沽期指賺到笑
歐美經濟市況立立亂，拖累港股好似坐過山車。喺亂世下，好友淡友都難免要輸錢，但正所謂有危就有機，前亞視執行主席張永霖（Linus）早前就獲高人指點，喺恒指二萬二千幾點時沽期指，賺咗唔少。依家港股繼續下跌，唔知佢有冇繼續沽期指呢？
收藏懷錶等升值
Linus早前出席一個投資論壇時，大談收藏名畫及名錶心得。Linus自嘲近年無工做，所以無收入，生活全靠食「老本」。佢直認炒股唔叻，過去幾十年，成績表僅僅打個和，好彩年前認識咗唔少財經專家，成為佢嘅股海明燈。
Linus語帶風騷話，八月大冧市前已沽清手上股票，仲沽咗幾張期指，但賺幾多就唔講嘞，但估計起碼有六位數字，難怪佢繼續掃字畫、買懷錶，絕不手軟。講到收藏古董懷錶，佢話係睇中內地富豪愛掃名錶嘅心態，加上懷錶價值相對落後喎。卓妮八到，Linus手上有幾十隻靚懷錶，呢批錶他日升值，相信又會大賺一筆。