中環出更：大舊石再赴花地瑪朝聖
立法會議員石禮謙（大舊石）係虔誠天主教徒，每次去歐洲度假，都會拜訪宗教聖地，而佢喺立法會休會放暑假期間嘅葡萄牙之旅，就喺花地瑪逗留咗兩日，感受吓聖地嘅靈氣。大舊石喺澳門出生，亦去過葡國花地瑪好多次，但佢坦言到當地唔係要祈求啲乜嘢，反而係要感謝造物主嘅眷顧喎。
感謝造物主眷顧
花地瑪之所以吸引教友，皆因喺一九一七年曾發生聖母顯靈事迹，並且得到教廷嘅確認，故此信眾聞風而至，至今遊人絡繹不絕。大舊石話經常去當地朝聖，係因為覺得自己嘅事業順利，女兒又聽教聽話，就算健康出問題，通完波仔又再生龍活虎，咁嘅人生歷程，都算蒙主恩澤喇。
大舊石仲話，有好多身體抱恙或肢體殘障嘅人，步履蹣跚咁走去朝聖，相比佢無穿無爛，其實係好幸福㗎喇！
佢隨即講咗個故事畀卓妮聽，話說有位小女孩喺朝聖之路中，不停埋怨爸爸唔肯買對新鞋畀佢，但當小女孩喺巴士上見到一位信徒無咗雙腳嘅時候，就覺悟到擁有健全嘅身軀係幾咁可貴。所以去朝聖令大舊石知足，會好珍惜身邊嘅一切喎。