政情：盧振雄歡送騷稍收斂
消防處「一哥」盧振雄退休在即，近日輪流去全港各消防總區作告別探訪。本報連續兩日踢爆佢下屬大搞歡送派對後，盧處長尋日繼續到上環消防局告別。
不過，可能佢哋擔心又畀傳媒撞破，盛大派對稍為收斂咗，啲休班消防員大多數着便服，只係少數人依舊着西裝赴會。
至於擔擔抬抬搬櫈搬梯影大合照嘅工作，就改由休班消防員幫手，唔使出動當值人手。唔單止咁，寫有「消防處處長榮休親善探訪」嘅橫額，只係掛喺消防局大樓嘅簷篷，而唔係拉架消防車做布景板，但消防「一哥」嘅座駕仍然佔用咗一條消防車泊位足足兩個鐘。
解釋冇規定着老西
臨走嗰陣，盧處長見有記者影相，本來驅車即閃，點知諗諗吓又兜番轉頭，仲絞低車窗同記者解釋，話無硬性規定要出席者着西裝，只係覺得西裝代表尊重，佢作為處長，着西裝係尊重同事、尊重個場合，都係想鼓勵同感謝同事，佢希望個個都係自願出席喎。