笑看天下：吹水謊話謝幕

煲呔曾臨收工諗住省吓招牌，點知愈整愈衰。上月中，為了讓李克強主持新政府總部揭幕儀式，日夜趕工，假天花由鋁變木，累警員墮地重傷；「門常開」竟變「門常漏」：耗資五十億元的添馬艦新政府總部雖不至於是豆腐渣工程，卻經不起高清紅外線掃描，發現多處漏水。本來小執漏梗有，最搞笑嘅係部分滲漏點儼如瀑布，新政府總部變滲水樓，你話係唔係天方夜譚？有啲嘢唔係趕就得，如今因趕工畀北大人剪吓綵，搞到大樓處處見哭牆，唔通咁樣會方便煲呔曾主持「早禱會」時好懺悔咩？點解臨收工都好似倒瀉籮蟹咁？

另一方面，由於「核心保安區」事件，警權擴張到侵犯市民日常生活的自由，政府有否反思？一哥立會解畫如演棟篤笑，一個人撞鬼原來會影響視線，更令人充滿說謊的能量。

《外交政策》發表文章，講述蘇聯解體問題，其中，前蘇聯總理雷日科夫這樣說：「我們監守自盜，行賄受賄，無論在報紙、新聞還是講台上，都謊話連篇，我們一面沉溺於自己的謊言，一面為彼此佩戴獎章。而且所有人都在這麼幹——從上到下，從下到上。」夕陽政府hea住散band，看來是吹水治港加上謊話連篇下，彼此佩戴獎章謝幕！