問一條ＩＱ題，今日邊度最多公公婆婆，茶樓？錯！公園？又錯！正確答案係銀行同郵局。
港府今日開始接收派錢登記表格，首批係六十五歲或以上長者，望到頸都長終於就快有錢派，銀行同郵局唔逼爆至奇咯。咪怪老人家心急吖，好多人等住呢六千蚊開飯㗎。
係人都知，香港冇退休保障制度，好多長者老無所依，老無所養，真係臨老唔過得世㗎。正如安老事務委員會負責人話齋，港府人口福利政策短視，長者喺房屋、醫療及交通方面嘅福利，仲差過內地同澳門。有爭取全民退休保障嘅團體建議，當局應該盡快研究推行全民退休保障，例如將生果金及綜援開支，加上強積金一半供款，再另外注資五百億元成立基金，咁就可確保全港長者每月有三千蚊，可以維持基本生活。
提起退休保障，真係火都嚟埋，香港地除咗公務員退休後無憂無慮，其他打工仔只能望天打卦。對低收入打工仔嚟講，退休惟有食穀種，冇穀種食嘅就慘咯，話就話有強積金，可惜唔湯唔水，似有若無，根本靠唔住。
話時話，強積金推行十年，手續費高到離譜，供款等於幫基金經理打工，早已為人詬病。但港府就關人個關，一味對強積金小修小補，拒絕推行全民退休保障，話之你臨老唔過得世喇。
其實，港府唔係冇錢，最弊該做嘅唔做，唔該做就亂嚟，例如寧願掟五百億推行九唔搭八嘅自願醫保計劃，養肥保險公司；又例如揼五十億搞個無厘頭嘅「關愛基金」，但就始終唔肯投放資源建立全民退休保障制度，簡直豈有此理。
冇錯，有人擔心推行全民退休保障可能會造成尾大不掉嘅後果，令香港變成好似歐洲國家咁嘅福利社會，成為沉重嘅財政負擔，遲早無以為繼。其實，事在人為嘅啫，只要有周詳嘅計劃，合理嘅分配，真正為老人家着想，以香港豐富嘅財政資源嚟講，呢啲根本就唔係問題。
正如關注團體話齋，就算全民退休保障存在技術問題，港府都應該提出切實可行嘅政策，而唔係翹埋雙手，乜都唔做。係咯，當局諗都懶得諗，連研究都慳番，一於得過且過，拖到夠鐘收工就拍拍屁股走人，咁叫做「做好呢份工」咩？咁叫做「以民為本」咩？
計功夫茶話齋，港府懶得研究唔緊要，家陣有人拋磚引玉，首先提出建議，如果當局仲係推三推四，阿芝阿佐，咁就抵畀人鬧「垃圾」喇！