中環出更：西貢金喜 潮人熱捧
潮州人重鄉情，無論喺邊度落腳都咁團結。胡氏成豐集團第二代傳人胡炎松（Anven），自細喺西貢長大，家族生意大本營亦喺西貢。Anven前日中午就約埋哥哥、西貢區潮州同鄉會理事長胡艷光，喺區內聞名嘅金喜餐廳聚腳。大家一邊歎靚女老闆娘Babi精心炮製嘅新派私房菜，一邊傾吓潮人潮事，開心到唔捨得散席。
當日在座嘅仲有西貢區潮州同鄉會副理事長黃信明，佢哋係香港龐大潮人組織之一，喺區內默默做咗好多善事，一貫潮人樂善好施嘅本色，好似呢兩日忙到氹氹轉嘅盂蘭勝會，辦得熱鬧又有朝氣，認真難得。
靚女老闆搞新派私房菜
當日聚腳嘅金喜餐廳位於西貢公路，已有五十幾年歷史。Anven話，金喜原本係一間茶樓，當年客似雲來，點心小食好味到不得了。幾年前由靚女老闆Babi接手後，搞搞新意思，變身為新派fusion私房菜。
Babi唔係潮人，但好鍾意西貢鬧中取靜嘅環境。佢熱情推介法式海鮮盤、川椒炒大蝦等私房菜，眾人未起筷先起哄，事關美食以成個鐵盤上碟，勁似開大食會，襯晒西貢鄉郊漁村嘅簡樸風情。Babi誠意推介酸辣醒胃嘅泰式海鮮醬同海鮮配搭嚟食，果然美味指數急升，冇得彈。