中環出更：利比亞義診 范寧無懼戰火
利比亞戰火不斷，唔少中國僑民都趁早離開戰地，但肩負救死扶傷責任嘅無國界醫生主席范寧就偏向虎山行，去到當地幫醫院設立手術室、培訓醫務人員、拯救傷兵及平民。雖然利比亞政府同反對派勢成水火，但仁心仁術嘅范醫生就話︰「醫生冇話幫邊個嘅」，只要有人需要救治就會伸出援手。
范醫生上個月跟無國界醫生去咗利比亞嘅米蘇拉德，逗留咗三個星期，啱啱今個月初先返港。去過好多地方做義工嘅范醫生話，當地真係幾危險，日日都有防空警報，最多試過一日響六、七次，每次都要搵地方匿埋。最難搞嘅係，當地電力供應唔穩定，試過做做吓手術突然冇電，好彩組織會帶後備電，手術先可以順利完成。
當地人家族觀念好重
雖然環境危險惡劣，但係范醫生話︰「有機會幫人而選擇唔幫，自己都會覺得有問題。」第一次去利比亞嘅范醫生話：「開頭仲以為嗰度啲人個個都係宗教狂熱分子，會好兇殘，但原來佢哋家族觀念好重」，事關好多喺外國做機師、會計師嘅利比亞人，都放棄外國嘅高薪厚祿返到自己嘅國家做義工，照顧喺戰爭中有需要嘅人。
范醫生仲話，當地人同中國人其實好密切友好，有次佢等車返醫院，當地人就擁埋嚟同佢打招呼，仲問佢係唔係蕩失路，使唔使飲杯咖啡抖吓。
唔講唔知，原來當地都有好多中國貨售賣，而且又住咗成五千個中國人，只係因為打仗先至離開當地喎，所以話戰爭禍害真係大。
卓妮