中環出更：王仁曼授舞 嚴師出高徒
香港芭蕾舞學會日前喺葵青劇院搞咗場「極地快車」嘅大型芭蕾舞劇演出，吸引唔少芭蕾舞愛好者去欣賞，除咗殿堂級人物王仁曼現身外，仲有芭蕾舞學會主席鄭瑤璋（Ada）、聯席主席伍曾慶寧（Helen）及名媛張天愛，一眾前輩為新一代嘅舞藝來個大檢閱。
培養自信紀律恒心毅力
王仁曼喺芭蕾舞壇地位舉足輕重，佢嘅高足亦各有所成，例如張天愛就同芭蕾舞畫上等號，而Ada同Helen呢兩位徒弟喺舞壇中亦有相當分量。Ada話，佢跟隨王仁曼習舞十年，除咗考獲七級嘅舞藝外，更重要係喺師傅嘅嚴格教導下，培養自信，紀律，恒心同毅力，對佢做人處世真係有莫大裨益。
雖然Ada目前投身商界發展，但仍醉心於芭蕾舞藝，所以由千禧年開始前已加入芭蕾舞學會做義務秘書，五年前升任主席，努力為本地芭蕾舞壇設立交流機會。至於Helen，佢亦話師傅對學生嘅要求好嚴格，好多同學因而心生懼怕，但亦因而做得更好，所以佢安排囡囡向王仁曼拜師學藝。
當晚王仁曼女兒陳靜儀（Liat）都有出席活動，Liat遺傳咗媽咪優良氣質，目前為王仁曼舞蹈學校擔任行政工作。王仁曼有一班徒弟承傳芭蕾舞藝術，相信佢會感到安慰。