中環出更：黃家和失iPad 囝囝補送氹番
忙中，好易有錯。剛剛忙於舉辦「金茶王比賽」嘅點點綠主席黃家和（Simon），前日不慎遺失一部iPad，一度非常失落，喺facebook呻到樹葉都落。話口未完，大公子黃浩鈞（Howard）即晚走去買部iPad2，靜雞雞放喺爸爸公司枱面製造驚喜，氹到Simon笑番晒。
Simon自認大頭蝦，前日同Howard飲完下午茶後，趕返會展搞美食博覽。晚上八點，忽然發現遺失部iPad，原來部機係囝囝去年送嘅生日禮物，Simon一度喺facebook訴苦，話幸好部機內無唔見得人嘅嘢，facebook有廿個留言慰問，但囝囝都冇搭訕，原來佢馬上用軟件遙控刪除遺失iPad內嘅所有資料，並靜雞雞走去買部全新iPad2。
Howard貌似方力申
翌日Simon返到公司見到份禮物，開心到幾乎喊出嚟。兩父子研究如何玩新機，之前幾唔開心都忘記晒嘞。Howard甚少亮相社交圈，原來佢喺爸爸公司任職餐飲服務部總經理，長駐上海打理中國業務，近排見爸爸搞金茶王比賽忙到氣咳，於是飛返香港幫手。
曾留學加國嘅Howard外形俊朗，笑容陽光，走在街上，經常被途人誤會佢係歌手方力申，仲問佢攞簽名，但Howard無意做明星，寧願做商界奇才。
卓妮