政情：梁美芬兜路避林武
專業會議立法會議員梁美芬（鼠王芬）自發表「選民懲罰論」後，民望大插水，坊間即時傳出多個政團打算趁機派人參選取而代之，有傳話鼠王芬能否保住議席，關鍵在於中聯辦九龍工作部部長林武（圖）呢個大靠山會否力撐到底。
鼠王芬同林武繼早前出席美髮美容業商會就職禮後，尋日又出席公屋聯會就職典禮，大家當然金睛火眼
實佢哋有乜舉動啦！但現場所見，兩人同上次一樣全程零交流，互動欠奉之餘，大家一見到對方行近就自動彈開，其中以鼠王芬最為避忌。
話說鼠王芬同林武都坐喺前排主禮嘉賓席，但就相隔兩個位，如要上坐，最簡單方法係喺台前較為闊落嘅通道直接行過去，但鼠王芬唔知做乜，山長水遠由後排兜個大圈行番上前排就坐，後排通道又窄，行起來要攝吓攝吓，真係睇到台下嘅嘉賓陰陰嘴笑。莫非鼠王芬真係咁驚被人要求佢同林武合照？