政情：李嘉誠：成功靠雙手
長實和黃尋日公布中期業績，主席李嘉誠喺記者會卻三番四次憶述自己以往努力嘅辛酸史，佢話當年社會無現時咁多機會，資源亦無咁充裕，自己由最窮去到今時今日，全靠雙手努力。佢又引用自己早排喺汕頭大學畢業典禮所講嘅致詞，話自己都算係不錯嘅成長教材，如果有人從佢嘅經驗悟出心得，都係好事。
誠哥話，自己十四歲開始擔起頭家，細細個已經要從逆境中成長，當年醫院會因為無錢而唔肯醫人，更要有錢至有書讀，自己無錢惟有去買舊書讀。佢話呢兩樣嘢現時香港都唔會發生，所以年輕人應該珍惜呢啲機會，唔好成日淨係識得投訴，而唔用時間諗吓可以學啲乜嘢。
誠哥講講下，更索性叫公關影印多份「檸檬汁人生觀」畀記者，呢份講詞係佢喺汕頭大學畢業典禮嘅致詞，裏面話人生無必然成功方程式，生活拋來一個檸檬，我們冇得選擇要唔要，但可以將佢榨為檸檬汁。