嗱嗱嗱，咪話功夫茶唔醒你，如果你係讀緊書嘅後生仔女，報讀護理系做護士絕對係一條好出路，薪酬優厚之餘基本上冇乜可能打爛飯碗，除非你蠢到害死病人。
先睇睇做護士有幾優厚嘅待遇吖，養和醫院上月起將註冊護士起薪點調整為總薪級表第二十點，較去年高一點，剛畢業註冊護士月薪高達三萬一千五百八十三元，頂薪點更加去到四萬七千多元。反觀公立醫院註冊護士咯喎，薪級點介乎第十五點至第二十五點，即係二萬二千二百四十元至三萬五千七百八十五元。同樣係新丁護士，私家同公家嘅起薪點相差接近一萬元。好明顯嘞，私家醫院發揮銀彈誘惑要向公立醫院挖角。
護士之所以咁吃香，無他嘅，人手短缺吖嘛，全港醫院都出現護士荒，咁咪大張旗鼓重金禮聘囉。同時又正正因為人手短缺，白衣天使只要冇犯下彌天大錯，院方點都唔捨得炒魷魚。你話嘞，做護士係咪錢途無限吖？
既然私家醫院出手咁疏爽，公立醫院有幾大影響呢？中文大學那打素護理學院院長李子芬就話嘞，今年入職醫管局嘅護士畢業生比率創出歷史新低，以往幾乎百分百畢業生投身公院，但今年只有百分之九十一，百分之七點五去私院工作，其餘進修。李子芬認為，除咗月薪較高之外，私院每年出十三至十五個月糧，甚至發放花紅，對畢業生相當有吸引力。
講到呢度，功夫茶心有慼慼然，事關護士吃香對於全港醫療系統而言唔係好事。萬一公立醫院人手短缺問題進一步惡化，受害嘅始終係冇錢幫襯私家醫院嘅病人。喂，羊毛出在羊身上㗎咋，護士薪酬高等於私家醫院收費貴，小市民邊有能力負擔呀？有病有痛被迫入住公院，隨時又因為六個蓋冚十個煲而淪為醫療事故犧牲者，好慘啫！
講來講去仍然係一個老毛病，食衞局局長周一嶽以及醫管局各位老爺奶奶一直尸位素餐，冇認真解決人手短缺問題，又冇提出有效嘅挽留方案。前日喎，多個護士團體同醫管局開會商討挽留人手措施，局方居然激到香港護士協會憤然離席抗議，原因係會議浪費時間重複討論與會人數以及資格問題，並唔係針對性商討挽留人手。
唉，周一嶽之流嘅特區高官居然仲好意思話要打造乜嘢醫療產業，連招聘護士都咁困難，打造條毛咩！計功夫茶話齋，現有醫療系統唔崩潰已經還得神落，打造醫療產業純粹係無可救藥嘅病態謊言。