政情：黑龍江政府好心做壞事

十公斤米贈港區人大

有份隨團訪問嘅港區人大代表兼工聯會立法會議員黃國健透露，四包大米每包米重二點五公斤，加埋即係有十公斤重，仲有一個叫「列巴」嘅俄羅斯式麵包，體積大過人頭。佢因為報咗名跟立法會去南韓考察標準工時，提早離團，冇帶走啲米同個包，隨團工作人員就好好心咁幫佢寄咗返香港。

港區政協委員下個星期亦會組團訪問新疆，雖然最近嗰邊又有恐襲，但係個團照舊成行。之前報咗名嘅政協陳鑑林臨時退團，但佢否認係因為擔心遇到恐襲，而係因為要跟所屬政黨到廣東考察，分唔到身先決定縮沙喎。