煲呔曾尋日開始就施政報告諮詢立法會政團，會面安排繼續親疏有別，首先接見兩大建制派政團民建聯同工聯會，點知煲呔曾為求搶鏡，六親不認，借兩大政團過橋宣示自己唔係跛腳鴨夕陽政府，非常無品，真係抵佢眾叛親離，冇晒朋友。
民建聯同工聯會尋日先後向煲呔曾講解佢哋嘅施政報告建議，煲呔曾喺會上已經表現得冇心裝載，聽唔入耳。見完工聯會之後，佢更罕有主動要求搶先工聯會一步，到政府總部大堂見記者，搞到一眾工聯會滿不是味兒，其中身兼行會成員嘅工聯會會長鄭耀棠，更疑似冇癮借故走先。
煲呔曾最後講嘅絕大部分都係廢話，不但冇回應到兩個政團嘅施政建議，仲死撐如果報告內嘅政策到位同回應到民意，相信下屆政府都會繼續做。煲呔曾漠視民意、民望破底，能否做完餘下十一個月任期都未知，仲想叫下屆政府幫你啲爛尾政策執手尾，真係癡人說夢、妙想天開。講番啲施政建議，工聯會要求港府每年復建四千五百至六千個居屋單位，將公屋上樓年期由三年縮至兩年，並每名納稅人免稅一萬元，以協助市民對抗通脹。