行政會議召集人梁振英（CY）為求參選特首，經常公開同政府政策唱反調，被指違反行會集體負責制同「政治抽水」。
尋晚佢又連趕兩場活動，先同一批青年自由黨成員去蘭桂坊飲嘢，然後再撲入屯門拜會當地鄉紳，並為自己經常唱反調「抽水」自辯。
尋晚有青年自由黨成員質問CY，話假如佢真係爆大冷當選特首，佢旗下嘅行會成員不斷唱反調會點做。CY辯稱行會集體負責制，唔代表行會成員嘅公開發言必須同政府政策一致，同大家嘅理解好唔同。但係一問到外傭爭居權問題，佢就話件事進入咗司法程序，加上自己係行會成員而避談，把尺實在令人難以捉摸。
之後佢仲大談未來政府要處理嘅八大關係，包括「一國」同「兩制」嘅關係、中央同特區關係、香港同內地關係、行政同立法關係、個人同社會關係、政府同市場關係、生產同分配關係、發展同保育關係。
市建局主席張震遠日前公開表態「挺梁」，一直被視為「梁營」嘅會計界立法會議員陳茂波（阿Paul）尋日同傳媒飯局，直言CY「係一個好好嘅人選」，即使未獲中央祝福，都應該畀佢入閘，因為冇理由㩒住唔畀人選，有辯論先有火花喎。
阿Paul又形容現時香港政局好悶，希望出現新變化，暗示唔撐喺政府多年嘅政務司司長唐英年，之後又指全國人大常委范徐麗泰嘅高民望，只係「積累落嚟嘅本錢」。講到咁明咁白，即使佢多番否認屬於「梁營」都冇人信喇！