政情：泛民爭選特首各懷鬼胎
明年特首小圈子選舉，無論泛民主派有乜嘢人出戰都好，結果都係陪跑慘敗收場。不過，落場有個好處，就係可以喺短時間內頻頻曝光，增加人氣，自然成為泛民各黨派必爭之地。白鴿黨話要全港進行初選，希望做到泛民共主；民協馮檢基又話要選，連即將成立嘅新工黨李卓人都有意藉此打響頭炮，總之選舉面前各懷鬼胎，將自己利益行先，甚至鬼打鬼冇面畀。
白鴿黨提出街頭初選機制，係因為該黨地區動員力強，其他泛民政黨根本無得鬥，所以白鴿提出呢個方案確係十拿九穩，利用初選勝出嘅氣勢，催谷明年嘅立法會勝算。
不過，咁大塊餅點止白鴿黨想分吖，民協馮檢基尋日同傳媒聚會時話，會支持初選機制，因為○七年佢無份協商泛民特首人選，所以最後惟有焗住支持公民黨梁家傑去選。
阿基又話，對抗替補機制同參選特首初選無矛盾，唔明白點解大狀黨一定要分開嚟搞，明寸佢哋點解扭扭擰擰，唔肯支持初選機制。佢仲話如果有人嫌初選唔夠公平，可以一半係初選，另一半做民調，咁樣就無嘢好嘈啦！明眼人都知，民協想分呢舊餅，係因為近年佢哋一直被邊緣化，只能穩守九龍西老巢，如果可以參加初選，有利提高全港知名度，有機會衝出九西。
白鴿黨核心人士爆料，就快成立嘅新工黨都想玩泛民初選，事關新工黨核心嘅李卓人積極考慮參選超級區議會議席，如果之前再參加泛民特首初選，絕對有熱身練兵之用，亦可為新工黨打響頭炮，省靚招牌。
公民黨拒初選益白鴿
直到呢一刻，只有公民黨對初選機制有保留，皆因佢哋嘅地區實力薄弱，如果跟白鴿黨搞街頭初選，實輸幾條街，變相幫白鴿黨抬轎，但如果靠民調定出人選，佢哋班大狀就有機會用明星效應一決高下。
不過，班泛民成日話特首選舉係小圈子選舉，依家竟然為咗選票就落場你爭我奪，甚至鬼打鬼無情講，與其鬧人「禮儀廉」，不如鬧吓自己無恥仲好過啦！