中環出更：霍何綺華分享乳癌經歷
和黃大班霍建寧太太霍何綺華向來低調，原來佢○三年時曾經患過乳癌要接受化療，康復後以「過來人」身份積極幫助其他患者，近年更出任香港乳癌基金會主席，日前更主動現身分享基金會創立嘅乳健中心運作情況。
食素多運動都中招
霍太話，佢向來運動多又食素，初時都唔相信自己會患癌，當丈夫知道佢患病後，三個月都冇離開過香港，喺外國讀書嘅兩個囡囡仲即刻返港陪佢。霍太又話，預咗化療會甩晒啲頭髮，於是一早買定個假髮，點知丈夫同佢講：「如果你真係甩晒啲頭髮，我剃光頭陪你！」聽到真係感動又溫情，最後霍太都可以順利康復。
病愈後嘅霍太沉醉喺屋企嘅田園生活，暫時已種咗番石榴、番茄及桂花樹等農作物，早前佢就用桂花製作桂花糕，又用「自家種」嘅薄荷葉泡茶，睇嚟霍大班平時在家都好有口福喎！
乳癌基金會將於今年十月去山頂舉行乳健康大步走，希望大家身體力行做運動減低患癌風險，同時為乳癌基金會籌款，霍太期望今年會有一千六百人參加活動。
卓妮