中環出更：葉迪奇型爆 揸「雷鳥」四圍飛
交通銀行副行長葉迪奇（Dicky）平時出席公開場合不苟言笑，十足銀行家形象，原來佢私底下係個健談風趣嘅型仔直升機師。Dicky上周六早上相約多年老友沙田區議員龐愛蘭環遊香江，佢戴上黑超、Cap帽，親自駕駛自己架大玩具Robinson R44雷鳥直升機遨遊天際。變身機師嘅Dicky英姿颯爽，型爆指數直逼靚仔機師王敏德添！
曾任皇家香港輔助空軍
Dicky有四十幾年揸直升機經驗，駕駛技巧純熟，無論係升上千呎高空、緊貼水面低飛，或者九十度轉彎，輕鬆自如無難度。沿途佢仲風趣介紹腳下嘅景物，喺短短四十五分鐘旅程中，遊遍鯉魚門、將軍澳、赤柱、南丫島，然後沿港島南區環繞維港一周，香港豐富多變嘅地形及風貌盡收眼底。
原來做機師係Dicky嘅夢想，六十年代佢已經係皇家香港輔助空軍（政府飛行服務隊前身）嘅後備義工，成為唯一嘅華人司令員。白天佢係西裝筆挺嘅銀行家，黃昏至翌日凌晨就變身為型仔機師，參與無數次救援或執行公務。印象最深刻係六、七十年代阻截非法入境者，同埋參與八仙嶺山火嘅救援工作。
雖然Dicky依家已唔做義工，但仍享受揸直升機嘅快感。佢笑稱，以前次次想辭職去做機師，公司就加人工畀佢，搞到最後走唔到。Dicky真係識講笑，佢原任滙豐中國區總裁，六年前被調派到上海交行，負責幫「大笨象」睇實喺交行嘅過百億元投資。交行愈做愈出色，依家年賺近四百億港元，Dicky功不可沒，滙豐股東梗唔捨得佢走啦！
卓妮