避雷裝置廢武功 懶官小心遇雷劈

冤枉呀老天爺!小人唔覺意路過㗎咋,假如天打雷劈追殺作奸犯科嘅壞分子,千祈千祈唔好禍及無辜呀!

大家可能會問,功夫茶因乜解究稟神咁稟?點解要向老天爺鳴冤呢?大家有怪莫怪,稟神咁稟實在有莫大苦衷,事關西鐵避雷裝置不設防,相關人等又闊佬懶理冇積極跟進,專家嘅意見就係,求神拜佛唔好行雷閃電劈中,否則一定好大鑊。所以咯喎,咪有必要稟神咁稟囉。

事件詳情係咁嘅,西鐵兆康站至澤豐花園廂形外罩上面嘅屯門河畔公園,總數十支避雷針導電銅帶全部被偷清光。避雷功能報廢已經得人驚啦,更加可怕嘅係,中斷而豎高嘅避雷針反而會吸引電流。避雷不成反引電,雷電交加隨時劈中兆康站區域西鐵列車。

根據香港工程師學會會長陳福祥嘅講法,避雷針被偷去銅帶會對建築物構成極大危險,因為用以引電嘅避雷針仍然豎立於公園之內,吸引電流但又缺乏銅帶將能量帶走,勢將危及建築物安全,有機會造成火警。

位於屯門河畔公園之內嘅避雷裝置究竟係邊個負責嘅呢?答案係康文署。香港理工大學機械工程學系工程師盧覺強,現場視察之後就話嘞,避雷針雷電次數記錄儀顯示數字係零,推測避雷針設立初期已經被偷去導電銅帶,康文署失職隨時害死街坊。

大家有眼見啦,夏日炎炎正係風雷火電嘅狂暴季節,再加上偉大祖國「還世界一個他媽的奇迹」,溫州高鐵慘遭雷擊而導致列車追尾相撞,西鐵站上面避雷裝置居然廢武功,你話係幾咁令人擔心嘅荒謬現象?再講吖,避雷裝置由建築署於○八年斥資三十萬元建造,負責管理嘅康文署都冇理由任得公帑白白浪費啫。

假如大家唔知點解會有人偷走避雷針導電銅帶,咁就有必要介紹一個新概念。「爛銅爛鐵」嘅講法已經過時,近日內地銅價每噸超過六萬三千元人民幣,電線銅回收價每公斤六十三元,利之所在,賊佬必來。

即係咁,康文署為己為人確係有必要盡快維修失去功能嘅避雷裝置,而且必須確保日後唔會再被偷走導電銅帶。你知啦,活該受罰於天打雷劈嘅壞分子有好多種,漠視民眾性命安全嘅懶惰官僚肯定係其中一種。如果一不小心五雷轟頂劈中康文署幾個懶官,咁就該煨咯!

不如咁嘞,康文署署長馮程淑儀都去稟神咁稟,祈望老天爺開恩唔好亂劈,求神拜佛保佑署方上上下下貴體安康,唔好咁邪真係遇雷劈吖嘛!