兩星期前我哋講過立法會新大樓座位，原本李國寶同霍震霆（Tim霍）兩個大懶蟲被編配坐埋一齊，但李國寶就要求同「金勞詹」詹培忠調位，避免因為同Tim霍一齊唔開會而經常出現兩張空櫈嘅醜態。不過，當李國寶成功調位後，新櫈都未坐過，近日又要求同坐喺隔籬嘅旅遊界謝偉俊（Paul）調位，希望同黃宜弘坐埋一齊，究竟今次又所為何事呢？
阿Paul透露，李國寶喺一星期前表示希望坐近啲黃宜弘，以便問對方應該點投票，加上佢哋兩個本來就係老友嘛，直到幾日前，黃宜弘再搵佢斟斟呢件事，於是佢就答應同李國寶互調座位。如果大家睇吓個新座位表，原先李國寶右邊係民主黨黃成智、左邊係阿Paul，成智分屬泛民主派，阿Paul投票又咁獨立，唔係逢政府必撐，難怪李國寶要調位同黃宜弘一齊坐。