中環出更：仁濟慈善晚會輕易籌百萬
仁濟醫院同「海外學生會」合辦嘅「海外學生仁濟夜」慈善餐舞會，前晚喺君悅酒店盛大舉行。仁濟主席李文斌同太太Amanda重返當年相識嘅場合，感覺零舍溫馨，兩人仲同即將升格做爸爸嘅仁濟總理王賢訊（Vincent）上台高歌一曲籌款，加埋名車、靚酒拍賣，成晚話咁易籌到過百萬元善款，一眾賓客又玩又做善事，極為盡興。
王賢訊太太 本月底臨盆
是夜派對由一眾年輕人落手落腳籌備，節目內容令人耳目一新。Vincent嘅新婚太太Vincci今個月底就臨盆，當晚腹大便便、不辭辛苦去撐場，事關老公係籌委會主席，加上妹妹朱瑩雅（Priscilla）又係海外學生會主席，佢梗要現身撐老公同妹妹啦！至於李文斌哥哥李文俊亦有到場打氣湊熱鬧。
當晚唔少善長獻愛心，仁濟前主席董吳玲玲捐出價值十幾萬元、三十二年歷史嘅法國六公升裝靚紅酒珍藏，經過幾輪激烈競投，最終由前仁濟主席嚴玉麟以廿二萬元投得。奔馳香港公司就大手筆送出價值六十幾萬元嘅全新平治SLK250豪華開篷跑車，結果亦以七十幾萬元賣出。米蘭站老闆姚君達為善不甘後人，捐出價值三萬多元嘅Chanel時款靚手袋供拍賣。
卓妮