新民黨早前做過一個青年自願參軍嘅簽名活動，一度令各界議論紛紛，仲畀人鬧佢哋想擦中央鞋兼幫後生仔洗腦。事件至今漸趨淡靜，但青年民建聯最近就有樣學樣，做咗個有關青年參軍意願調查，趁明日「八一」建軍節公布調查結果，仲講吓時下青年人對駐港部隊嘅印象、參軍願望等。咁樣抄橋擦中央鞋，因住隨時擦鞋擦出禍呀！
新民黨之前搞嘅簽名運動，呼籲市民支持解放軍開放香港居民自願參軍資格，雖然最後收集咗成四千個市民簽名，但開放軍籍要通過《基本法》，又要中央軍委決定批唔批，一啲都唔簡單。當時有時事評論員話參軍要先入黨，又鬧新民黨主席葉劉淑儀唔知國情兼為咗擦鞋幫後生仔洗腦。青年民建聯今次翻抄呢個議題認真牙煙，分分鐘畀人鬧爆收場，得不償失。