政情：陳晴嘆在職母難哺乳
愈來愈多媽咪明白母乳哺育嘅好處，但好多在職媽咪都未必可以餐餐餵到新鮮母乳畀BB。初為人母嘅聯合國兒童基金香港委員會主席陳晴（Judy），尋日出席國際母乳哺育周活動時，就話感受到社會對母乳餵哺嘅配套不足，亦明白對在職媽咪有一定難度，希望老闆們可以體諒，額外增加員工嘅產假。
當禮物送囝囝
Judy八個月大嘅大隻囝囝，至今仍餵緊母乳，一半母乳加一半糊仔，咁好營養，難怪囝囝已經廿二磅重。Judy記得囝囝剛滿月時，佢就要出去開會，心情囉囉攣，因為要趕返屋企餵奶，但點辛苦都值得，因為過程係個好好嘅親子活動，佢亦好享受呢種愛的交流，仲覺得送咗一份好好嘅禮物畀囝囝添！
講開又講，媽咪生BB咁辛苦，係好需要爸爸嘅支持，所以Judy話要頒個獎畀所有BB嘅爸爸，因為產婦好容易有產後抑鬱，要多得丈夫嘅支持喎。