政情：演講照稿讀梁卓偉狡辯
世界各地嘅政府官員接受傳媒同市民質詢係天經地義嘅事，但煲呔曾領導嘅夕陽政府卻係反其道而行，有得快閃就快閃，避無可避時就索性做人肉錄音機敷衍回應，而公開發表演說又係跟講稿照讀，無論面對內地或國際元首，實在難登大雅之堂。不過，食物及衞生局副局長梁卓偉（Gabriel）就捩橫折曲狡辯官員跟稿讀嘅理由，最離譜係竟然擺一班新聞官上台。
政治能力免疫力有問題
智經研究中心同三十會尋日搞咗個領袖論壇，出席嘅哈佛教授迪恩‧威廉姆斯喺全程無演講稿嘅情況下，企喺台上就「何謂真正嘅領袖」發表咗大半小時演說，相反煲呔曾之流嘅政府官員就要企喺個講台上跟稿發言，貨比貨之下，煲呔曾完全被比下去。有講者就忍唔住寸爆夕陽政府官員好似有「HIV」病毒，並解讀為政治能力免疫能力有問題，完全唔可以揮灑自如演講。
身為夕陽政府一分子嘅Gabriel聽到之後，二話不說就開腔「死雞撐飯蓋」反駁，首先笑笑口話佢以前以教授身份演說時都係周圍走，但做咗官員後就唔敢喇。此話何解？Gabriel以出席施政報告諮詢會為例，話曾經有政黨代表同佢講，行來行去講嘢會令大家無法將個鏡頭對住佢嚟影，其次有人話佢一路講嘢一路周圍行，係唔係過度活躍喎！
不過，要數最離譜嘅係，Gabriel話有新聞官同佢講，如果唔跟講稿演說五分鐘，佢哋就要用半個鐘先至出得到演說嘅全文，如果過咗凌晨夜一夜先出到新聞稿嘅話，就會畀傳媒話喎。估唔到佢咁嘅說話都講得出，為求幫自己同一眾庸官跟稿讀嘅冇料做法開脫，不惜將班新聞官擺上枱，呢番解釋好聽啲就係「塗脂抹粉」，難聽啲就係廢噏兼狡辯。
Gabriel愈講愈興奮，最後連「HIV」病毒都要駁斥一番，話由於當局經常叫人打針，所以大家嘅免疫力非常好，之後又無厘頭話流感季節即將來臨，提醒大家記住要打針喎！
老實講，Gabriel與其有咁多心思諗埋啲夾硬嚟嘅解釋同搞爛gag，倒不如畀啲實力人哋睇吓，喺冇講稿下暢所欲言，相信到時就無人會敢諸多意見喇！