中環出更：職場名人分享辛酸史
職場上表現出色嘅領導者，個個都有個賺人熱淚嘅奮鬥故事，就算含住金鎖匙出世嘅太子爺都唔例外。智經研究中心尋日搞咗個領袖論壇，好多名人出席分享自己嘅辛酸史，卓妮會為大家逐一講吓。
阮太曾被屈靠緋聞男友上位
有「中電一姐」稱譽嘅中華電力副主席阮蘇少湄，係中電百年歷史上首位獲委任為常務董事嘅華人，但佢不諱言當年被屈靠緋聞男友上位，因此承受好大壓力，而佢媽媽好困擾，覺得囡囡受到委屈，後來阮太憑實力證明自己嘅真本事，謠言不攻自破。
亞洲金融行政總裁陳智思（Bernard）作為泰國望族嘅後代，名副其實含住金鎖匙出世，但佢都有痛苦經歷。約十年前，佢因為錯信合夥人，冇跟足公司嘅業務，結果搞到被證監會邀請助查兩年。經此一役，佢梗學到嘢啦！
市區重建局主席張震遠未出任公職前，曾經係一間倫敦上市公司主席，原本公司每年賺幾十億元，但因為佢未能預測金融風暴嘅威力，導致公司受到好大衝擊，呢個慘痛經驗令佢畢生難忘。
最後卓妮會講吓唔少前輩都睇好嘅華人置業集團劉鳴煒，佢坦言做接班人唔容易，佢形容家族生意係冇民主、透明度唔高，尤其係遇上精明能幹嘅創辦人，要游說上一代接受自己意見並非每次都成功，所以要同上一代多溝通，凡事要循序漸進喎。
卓妮