政情：議員訪韓遇特大暴雨
俗語話「貴人出門招風雨」，立法會人力事務委員會早前拉大隊到南韓考察當地實施標準工時嘅經驗，點知適逢南韓首都首爾及鄰近地區下特大暴雨，造成至少有幾十人死亡同幾百人無家可歸，一眾尊貴議員安全即時惹起大家關注。
好在最後個個都無穿無爛喺前日平安返港，無為今次行程蒙上陰影，立法會秘書處職員當堂放下心頭大石。
考察標準工時
講番今次考察之旅，班議員先後同當地政府代表、兩個最大工會會面，就落實標準工時交換意見，工聯會葉偉明都覺得好有得着，因為標準工時係好敏感嘅議題，南韓都要用七至八年時間分階段完成標準工時。
葉偉明認為香港依家喺標準工時呢個議題仲係「十畫未有一撇」，到時係咪要過渡期都可以再傾，反而當務之急係，如果勞工及福利局係有心做嘢嘅話，就應該派出局長張建宗等人去實地考察了解一下喎！