車仔維拉決戰大球場

巴克萊亞洲錦標賽王者戰今晚於大球場開波,由英超雙雄車路士及阿士東維拉爭冠,車仔亞洲之旅三戰全勝未受考驗,今場屬少帥保亞斯真正考牌戰。維拉主帥麥利殊話明今場只屬五五波,更於記招寫下「Clean Sheet」(不失球)紙條,絕對唔會畀保亞斯輕鬆捧盃,兩軍各不相讓,決賽激戰可期!(有線201及301台周六晚8時30分直播)

車路士亞洲之旅頭三場全勝,首仗以一比○險勝馬來西亞明星隊,近兩場對泰國明星隊及傑志均大勝四比○。不過,主帥保亞斯明言今場級數有別於之前幾場賽事,預期大軍會真正受到考驗。回顧車仔頭三場表現,王牌前鋒杜奧巴仍屬隊中取分之匙,「王子」費蘭度托利斯尚未重拾射門鞋,上場後備上陣獲大批球迷力撐,可惜連番失機,亞洲行仍然食白果。

保亞斯考牌前猛耍太極

車路士新帥保亞斯於賽前記招繼續成為焦點,雖然今場屬決賽,但保帥言談間暗示會嘗試唔同球員組合,同時估計維拉都會試陣,勝負將取決於雙方臨場發揮。保亞斯並冇透露決賽布陣,反而帶傳媒遊花園,席間大談今季英超爭霸形勢,指出曼城瘋狂燒錢擴軍實力大增,阿仙奴亦積極提升實力,利物浦都決心爭入前四,預期競爭會好激烈,似乎行咗啲喎。

阿士東維拉麥利殊同樣新官上任,當談及對新車帥保亞斯睇法,麥帥最初表現客氣,大讚保亞斯於葡萄牙擁有豐功偉績,車仔重金禮聘此子實冇衰。不過,麥利殊講講吓重提陳年往事,透露自己於蘇超教波時期見過保亞斯,當時對方仲上緊領隊訓練班,明寸保帥年資唔夠。雖然車仔睇落贏面較高,但麥帥強調今場只屬五五波,希望球員全力以赴踢場好波。

「Clean Sheet」揭麥利殊戰術

另外,據探子回報,麥利殊於紙上寫上「Clean Sheet」,目標盡在不言中,相信麥帥會要求球員做好防守,再以快翼艾邦拉荷及射手戴倫賓特突襲。

維拉新門神基雲上場對布力般流浪表現神勇,中堅占士哥連斯八面玲瓏做埋MVP,兩人將力拒車仔球星來犯。記招尾段突然行雷閃電落大雨,在場唔少人士呆一呆,麥帥則陰陰嘴笑,莫非已度好雨戰拆「車」劇本?

往績方面,計同聯賽及盃賽,兩軍對上三季先後七次交手,車路士取得四勝兩和一負,雙方上季聯賽兩戰均打成平手,今次將會易地決一高下,且看誰勝誰負。

賽制︰季軍及冠軍戰均不設加時,賽和即射十二碼分勝負