政情：張建宗捱義氣幫林D9
夕陽政府搞替補機制一鑊泡，一直由政制及內地事務局局長林瑞麟（林D9）單打獨鬥，依家政府跪低諮詢兩個月，夕陽政府官員繼續「大難臨頭各自飛」，其中政務司司長唐英年「條條fing」放大假闊佬懶理，留低林D9自生自滅。林D9連日來去完立法會又上電台，尋日又要到工聯會擦鞋，以爭取工聯會立法會議員支持。
不過，一直單打獨鬥嘅林D9尋日終於等到救兵，就係同替補機制大纜都扯唔埋嘅勞工及福利局局長張建宗，一齊拍檔出席工聯會舉辦嘅替補機制諮詢會。張建宗發言時講到，佢同林D9一同出現顯示政府團隊關心呢個議題，會後仲笑笑口話，佢同林D9已經出席過好多次同類諮詢會喎！唔知當時林D9聽到後會否感到心灰意冷呢？事關如果真係夠團隊精神，同替補機制相關嘅問責官員都應該幫吓手擋箭啦！