中環出更：金刀梁北上做院長？
行政會議成員梁智鴻（金刀梁）公職多多，除活躍於政壇外，仲係港大校董會主席。卓妮八到，傳聞金刀梁又有新工作，就係擔任「香港大學深圳醫院」（濱海醫院）院長。如果屬實，睇怕大家以後見到佢就要改口叫「梁院長」嘞！
過渡性質 任期得半年
港大同深圳合作嘅「濱海」，今年底將分階段投入服務。咁大個Project，院長人選好關鍵。金刀梁早前賣關子，話人選必須同港大有關係，兼且喺醫學界地位崇高，隨即引來唔少揣測，更一度盛傳其胞弟梁智仁醫生有機會坐呢個位。話口未完，聽聞院長人選已拍板，據聞係金刀梁本人喎。不過，呢個安排只係過渡性質，所以任期只係得半年，等「真命天子」有足夠時間適應，坐穩個位。
咪以為新院長好易做，貴為「濱海」一哥，萬一出事要負上刑責。最頭痕係，院長要調動港大醫學院人員，雖然話港深兩地一水之隔，但要「使」得郁星級教授北上助陣，少啲牙力都唔掂呀。
卓妮