政情：鄉局新大樓多甩漏
耗資接近兩億元嘅沙田石門鄉議局新大樓，外觀建築宏偉，設計古色古香，早前開幕冇幾耐已經成為香港地標之一，認真可喜可賀。不過，「金玉其外，敗絮其中」，新大樓未入伙前已有鄉紳發現大樓內部用料同手工認真麻麻，不諱言好多地方都有待執漏，鄉議局執委會尋日仲宣布，大樓內大劇院嘅舞台地板因為漏水而要重鋪，開幕之初就搞成咁，都咪話唔得人驚！
水漬如淚痕 扶手唔得體
其實鄉議局新大樓裝修差已經傳咗好耐，之前有鄉紳同我哋講，整幢大樓用料同手工都唔夠水準，好似屋頂簷篷做得唔夠出，搞到雨水會沿住牆身滲落，雖然唔會整濕大樓內部，但就留咗一條條水漬喺牆身，有鄉紳就大呻水漬似眼淚痕，一行一行留喺鄉議局，唔怪得搞到風雨飄搖啦！
舞台要重鋪 林偉強捱轟
水漬之外，由於大樓係開放式中庭設計，每逢打風落雨都會撇濕大樓通道，本來呢個都係預計之內，只要將地板整到斜斜哋就可以去水，但近日連場大雨，竟然發現通道有幾攤積水，真係睇到都嬲。又有鄉紳反映，大樓各樓梯扶手設計竟然似足小學，鐵扶手上包層膠就算數，又話坑渠蓋厚度薄咗，擔心大力啲都踩爛，咁嘅手工同設計認真唔值兩億囉。
不過，上述幾項都唔係最大件事，最大鑊係連大劇院嘅舞台竟然都因為漏水而要重鋪，工程暫定八月底至九月初做，聽到確係離譜。據聞唔少鄉紳一直都對身兼新大樓建築工程專責委員會召集人嘅鄉議局副主席林偉強嘅表現好不滿，今次仲搞到要新大樓管理委員會主任委員劉業強幫佢執手尾，負責跟進舞台地板重鋪工程。
其實今次已非首次揭發新大樓內部裝修手工馬虎，早兩個月執委會上已經有鄉紳提出過呢個問題，主席劉皇發為免瓜田李下，一早講明唔會理新大樓工程事宜。咁到底新大樓甩甩漏漏呢個大頭佛最終邊個負責呢？大家竟然冇追究落去。
講開發叔，鄉議局為表揚佢嘅貢獻，決定將佢個全身銅像放喺大樓內，原本銅像放喺地面嗰層，位於兩條自動電梯中間，成「Ｘ」狀，有鄉紳擔心兩條電梯好似把鉸剪咁剪落發叔個銅像唔多吉利，所以近日決定將銅像改放一樓，而地面就改放一個以《天地人和》為主題嘅銅塑。唔知《天地人和》被剪會否一樣被人話唔吉利呢？