中環耳目：葉時忠 台灣水果當午餐
盛夏酷熱難擋，胃口大受影響，所以食得輕盈清淡至係正道，尤其係多食蔬果。長榮航空香港分公司總經理葉時忠（Clark）都係健康一族，佢自爆經常將台灣水果當午飯，一次過食三、四種唔同嘅生果，既可以清吓腸胃，又有飽足感，難怪佢身形保持得咁好。
特賣會試食 讚不絕口
早前台北貿易中心喺佐敦永安百貨舉行「台灣優質水果夏季特賣會」，主辦單位特登喺酒樓舉辦試食會，以台灣時令水果入饌，包括「炸香蕉伴醬皇蟶子」、「彩虹鳳梨一口牛」以及「楊桃清燉斑骨湯」。Clark係台灣水果嘅狂熱分子，自然食到讚不絕口。
Clark勁鍾意食生果，佢次次返台灣必帶水果返港，至愛杧果、芭樂及蓮霧等。佢話中午如果冇應酬，多數喺公司自製水果大餐，通常食一個奇異果、一條香蕉、十幾粒葡萄加埋蓮霧等，撐到夜晚八、九點都唔覺餓，見佢身形保持得咁好，愛靚嘅朋友都應該會心思思想試吓。