政情：楊官出電子書教英文
公認英文頂呱呱嘅前首席大法官楊鐵樑（楊官），繼上次出咗本趣談英語嘅書籍後，今次再下一城，出埋電子版本，為紅十字會籌建新大樓，尋日楊官親身去宣傳，但表明對呢啲新科技唔係好習慣喎！不過，楊官話科技潮流係無可避免嘅，因為既可發聲又夠環保，老人家都要嘗試去適應。佢又話，一本書同讀者嘅關係就好似朋友咁朝夕相對，但電子書嘅容量極大，隨時有成千個朋友陪住你！
好多人都向楊官請教學英文嘅方法，更有人叫佢推介啲英文經典。楊官話，學英文係無捷徑嘅，其實學習閱讀英文由自己嘅興趣開始就得嘞，唔好以為學到莎士比亞或狄更斯嘅英文就叫做好威，因為現代人係唔會講古文嘅，就好似大家唔會用孔子嗰套中文嚟溝通一樣。話時話，楊官會喺嚟緊嘅周日，出席書展同大家分享佢嘅六本「飛佛」英文書，但為免簽名簽到手軟，佢好醒目咁準備咗簽名印章嚟招呼啲粉絲。