中環出更：新知舊雨惜別立會大樓
立法會尋日舉行惜別立法會大樓儀式，過百位前任、現任議員、多位以往和現任採訪立法會記者，出席同大樓講再見，立法會新知舊雨聚首一堂，場面盛況空前。原來，呢度舉行過九百四十七次立法會全體會議，通過咗近千六條法案。
尋日傍晚，立法會無唇槍舌劍、刀光劍影，只有衣香鬢影。議員同前議員於下午五時陸續嚟到立法會，無論是在會議廳、前廳、立法會走廊，人人都手持相機以各種組合留倩影。
由一九八五年啟用至今，喺大樓裏面討論過嘅話題彷彿一道歷史長廊，廿六年過去，正如已故議員司徒華新出版嘅回憶錄書名：大江東去。
疑似特首候選人范徐麗泰同政務司司長唐英年，由於都係前立法機關議員，所以佢哋都「攞正牌」返去惜別。
范太以前任主席身份發言時話，日後新立法會大樓同政府總部毗鄰而居，希望行政和立法機關多啲交流，又話無論做官或者做議員，其實都係想為市民服務，符引起全場掌聲。唐英年尋日臨時報名現身立法會大樓，但佢就無公開講嘢，只係坐番喺自己嘅舊座位緬懷一番。
按籍貫分批影相
惜別晚宴上，議員按籍貫、按立法局或立法會嘅屆別分批影相，甚至冇回鄉證議員、臨時立法會議員都分組拍照。
卓妮