原來新大樓仲有另一套議員座位表，就係將來用來開財務委員會及內務委員會嘅一號會議室，同會議廳唔同，會議廳係橢圓形嘅，一號會議室係長方形，各黨派嘅座位編排同會議廳亦有分別，今次變咗工聯會四子坐喺掟嘢三人組隔籬，估計將來一定會擦出火花。
根據座位安排，坐得最近嘅係王國興，其次係過往多次同三人組口角嘅黃國健。其實不論係會議廳或一號會議室，如果三人組掟起嘢上嚟，最危險唔係坐側邊嘅議員，而係坐前面嗰班「五散人」，當中以廠商會林大輝、資訊科技界譚偉豪同保險界陳健波食得最應，隨時要帶定把遮或頭盔開會，否則就惟有寄望三人組掟嘢力度夠兼掟得準，唔好誤中副車。
總之係新環境有新秩序，大家都有新嘅適應。